آخر الأخبارالمرأة والأسرة

20 نصيحة لتحسين شهية طفلك بقلم.هبة عبد الرحيم

20 نصيحة لتحسين شهية طفلك دون الحاجة إلى الشبشب😅

اكتر شكوى بسمعها على الإطلاق من كل الأمهات ودايماً الشكوى بتبقى مصحوبة بطلب
وهو: اكتب له فاتح للشهية🙄

هو فيه حاجة كده أصلاً⁉️

للأسف لأ … من سنين طويلة والأدوية دي اتسحبت من السوق لأن كان لها مضاعفات كبيرة….
واللى مكتوب عليه فاتح شهية الأيام دى إما هاضم أو فيتامينات .. ودي مش فواتح شهية أصلاً.

أمال الحل إيه⁉️

جايلك في الكلام أهو….

الطفل طفل ومحتاج نتعامل معاه بنفس طريقة تفكيره وبأساليب طفولية شوية ،،
♡ في طريقة تقديمنا للأكل
♡ في شكل الأكل
♡ في أسلوبنا معاه ..وهكذا

لكن الإجبار والضغط مستحيل يجيب نتيجة مع أطفالنا 🚫

في البوست ده هقدم لك 20 اقتراح لتحسين شهية طفلك لازم تطبقيها…

هاتى ورقة واكتبي ال20 نصيحة (عناوين بس) وعلقيها على الثلاجة وبعد شهر عرفينا النتيجة….

🔶️️1- وجبة الإفطار🔶️

عارفة ان وجبة الفطار بتحسن من عملية التمثيل الغذائي⁉️ للجسم على مدار اليوم وبالتالي بتحسّن من شهية الطفل .. يعني الطفل اللي مش بيفطر طبيعي ان شهيته للأكل تقل باقي اليوم 👎

وعشان كدا لازم تكون وجبة الفطار في البيت إلزامية وصحية حتى لو بسيطة

🔶️2- نقدم للطفل ميّه يشربها قبل الأكل بنصف ساعة🔶️

المفروض نشّرب الطفل ميّة🍸 اول مايصحى من النوم وحتى قبل مايشرب اللبن بتاعه كمان ، وعلى مدار اليوم ويكون قبل الأكل بنصف ساعة ، هتفرق في شهيته جداً .. جربوها.

🔶️3- تقديم الأكل كل ساعتين……🕛🔶️

فيه أطفال مش بتجوع أوي وبالتالي بترفض تاكل لعدم إحساسها بالجوع .. الحل معاهم يكون بتقديم وجبات منتظمة كل ساعتين وده هيحسن من أداء الجهاز الهضمي وبالتالي هيحسن من شهيتهم وهيطلبوا الأكل أكتر … من الاخر كده لقطوا لهم الأكل.

🔶️4- الفول السوداني🥜🔶️

وده بيسموه “ملك المكسرات” ♡♡وده لدوره المهم في تحسين الشهية وإمداد الجسم بالبروتينات♡♡

حاولوا تدخلوه على شكل زبدة أو كريمة أو بأي طريقة بقى .. أنا مش الشيف حسن .. وبلاش نقدم بالشكل العادي (حبوب) قبل سن 3 سنوات خوفاً من البلع بطريقة خطأ ويدخل مجرى التنفس.

🔶️5-الزبادي بيفتح الشهية🔶️

عشان بيحتوي على بريبيوتك وكالسيوم واللي ليهم دور فعال في تحسين الشهية.

🔶️6-قدمي الأكل اللي بيحبوه الأول🔶️

الاطفال اللي شهيتهم معدومة للأكل بس بيحبوا أكلات معينة ، نقدمها في الأول ومن خلالها يتقبل فكرة انه ياكل من الأساس وبعد كده نبدأ وراها ببقية الأكل.

🔶️7- بلاش تعتبروا اللبن وجبة 🔶️

غلط ❌
في أطفال كتير بتعاني من فقدان الشهية بسبب too much milk بيشربوا لبن اوووفر🥛،، وده بيقلل من تقبلهم للأكل بشكل قوي .. قدمي اللبن في شكل أكل ،جبنة🧀، زبادي، كريمة ، مهلبية….. وهكذا.

🔶️8- بلاش أكلات هندية🔶️

اشمعني هندية⁉️
لانهم ديما بيستخدموا توابل وبهارات قوية🌶 للأكل دهغير السمنة والزيوت ومعروفين بكده ، فلو بنقدم للطفل الأكل بالطريقة دي ، انسي انه ياكل ، قللي الزيت أو السمنه تماماً، واستخدام البهارات والنكهات للأطفال محبب بس بطريقة بسيطة زي النصيحة اللي جايه 👇

🔶️9- التوابل بتفتح الشهية🔶️

الشمر والقرفة والكزبرة وغيرهم كتير .. بتساعد في تحسين شهية الطفل بس نستخدمها بأسلوب بسيط.

🔶️10- عصير الليمون الفريش والزنجبيل بالعسل🔶️

✅الليمون🍋 بيساعد على الهضم والشهية
✅الزنجبيل مع العسل🥃 بيحسن من الشهية والمناعة كمان.

🌻🌻🌻🌻🌻🌻🌻🌻🌻🌻🌻🌻🌻🌻🌻🌻

🔘️11- خليهم مبسوطين☺ أثناء الأكل🔘

بلاش نتطرق لأحاديث ممكن تضايق الطفل🤨 أثناء الأكل وتوتره ، حاولوا تتكلموا معاهم عن أي شيء يبسطهم ، هتفرق👍

🔘12- الجو الحار بيقلل الشهية🔘

بالفعل لو الطفل قاعد في جو حار 😓صعب ياكل كويس ، لازم نهوي المكان كويس أثناء الأكل.

🔘13- اللعب وممارسة الرياضة بتفتح الشهية🔘

جربي كده تزودي وقت اللعب🏃‍♂️ لابنك أو تخليه يمارس رياضة بيحبها وشوفي الفرق 💪

🔘14- المشاركة🔘

معظم الأطفال اللي شهيتهم قليلة بتتشجع نفسياً لما بتشوف اطفال 👩‍👦‍👦بتاكل معاها كويس.. فلو قدرنا نعمل مشاركة هتفرق .. ده غير دور الحضانة واللي معظهم بيطبق الأسلوب ده في الاكل.

🔘15- الزنك بيفتح الشهية…..✅🔘

بيفرق جداً في تحسين الشهية ، الكاجو ونخالة القمح بيحسنوا من مستوي الزنك في الجسم ،، وممكن نقدم الزنك علي شكل دوائي…..

🔘16- الحديد بيفتح الشهية…..✅🔘

أنيميا نقص الحديد من أهم مسببات قلة الشهية فلازم نستبعدها ،، ولو موجودة بيتم إعطاء الحديد للطفل لمدة من 1.5 – 3 شهور …..
وخلى بالك 🧠حصول الطفل على جرعات من الحديد كوقاية من الأنيميا بتفرق في تحسين الشهية.

🔘17- السكريات…..🔘

🚫بلاش نكتر من السكريات🍬🍭 عشان بتفقد الشهية
أفضل ندي الفواكه اللي بتفتح الشهية…..
واهمها……
التوت🍒 والعنب🍇 والتفاح🍎

🔘18- الوجبات الخفيفة….. 🔘

الطفل اللي بيعتمد على الوجبات الخفيفة لقلة شهيته لازم نستغلها في اننا نقدم أكل صحي مكانها تدريجياً♻️ ……
بدل ما بنقدمله بسكويت🥐 نخليها سندوتش🌯 مثلاً ……
بدل ما بنقدمله شيبسي نخليها فاكهة🍓🍌…….
وهكذا…… {التبديل هيفرق جداً في تحسين الشهية👍}

🔘19- شكل الأكل…..🔘

90% من الأطفال بيعتمدوا في شهيتهم على الشكل ، نحاول نقدملهم بطرق جميلة تلفت نظرهم ، بتفرق جداً

🔘20- الاطفال اللي بترضع طبيعي🔘

لو إبنك بيرضع طبيعي يبقي لازم تجوعيه و تخلي حد غيرك يأكله بشرط إنه ما يشوفكيش وهو بياكل ولا حتى يسمع صوتك.
🌻🌻🌻🌻🌻🌻🌻🌻🌻🌻🌻🌻🌻🌻🌻🌻

💠 في النهاية.. سجلوا💠

لو ابنك في يوم أكل كويس جداً ، سجلي كل الملاحظات اللي حصلت في اليوم ده ، أكل فين ؟ مع مين ؟ أكل ايه؟ شرب مياه أو ليمون قبل الأكل ؟
وابدأي تنفيذها في الأيام اللي بعد كده … أولادنا يستاهلوا نتعب عشانهم ، مش كده ولا إيه ؟

الأمومة مش سهلة بس مستاهلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق
إغلاق